वर्ध्यात युवा सेनेचा ‘दीपक ट्रेडर्स’वर छापा; सुगंधी तंबाखू आणि गुटख्याचा मोठा साठा उघड!
दुकानदाराची मुजोरी: कार्यकर्त्यांना धमकावून दुकान वाढवून पसार; पोलिसांच्या भूमिकेवर प्रश्नचिन्ह
वर्धा:
शहरातील मुख्य बाजारपेठेत असलेल्या ‘दीपक ट्रेडर्स’ या प्रतिष्ठानात मोठ्या प्रमाणावर प्रतिबंधित सुगंधी तंबाखू आणि गुटख्याची विक्री सुरू असल्याची खात्रीशीर माहिती मिळताच, युवा सेनेच्या कार्यकर्त्यांनी आज या दुकानावर धडक दिली. या कारवाईत दुकानात गुटख्याचा मोठा साठा आढळून आला असून, धक्कादायक बाब म्हणजे या ठिकाणी अमली पदार्थांच्या सेवनासाठी वापरले जाणारे साहित्यही सापडल्याने खळबळ उडाली आहे.
नेमकी घटना काय?
मिळालेल्या माहितीनुसार, वर्ध्याच्या मुख्य मार्केटमधील दीपक ट्रेडर्स येथे छुप्या मार्गाने मोठ्या प्रमाणात अवैध मालाची विक्री होत होती. युवा सेनेच्या कार्यकर्त्यांनी आज दुपारच्या सुमारास या ठिकाणी धाड टाकली. यावेळी दुकानाच्या मागील भागात आणि गोदामात सुगंधी तंबाखू व गुटख्याचे मोठे पोते आढळून आले. इतकेच नव्हे तर, गांजा पिण्यासाठी वापरला जाणारा ‘गोगो पेपर’ आणि ‘एमडी ड्रग्स’ सारख्या घातक नशिल्या पदार्थांच्या सेवनासाठी लागणाऱ्या वस्तूही कार्यकर्त्यांच्या नजरेस पडल्या.
दुकानदाराची मुजोरी आणि पलायन
कार्यकर्त्यांनी या अवैध साठ्याबाबत जाब विचारला असता, दुकानदार शंकर आस्वानी याने नम्रता दाखवण्याऐवजी कमालीची मुजोरी केली. उपस्थित युवा सैनिकांनाच खोट्या गुन्ह्यात अडकवण्याची धमकी देत त्याने वाद घातला. वातावरण तापत असल्याचे पाहून सोडेजा याने तातडीने दुकानाचे शटर ओढले आणि कार्यकर्त्यांना न जुमानता तिथून पसार झाला.
पोलीस प्रशासनावर संताप
घटनेचे गांभीर्य ओळखून युवा सेनेच्या कार्यकर्त्यांनी तात्काळ भ्रमणध्वनीवरून पोलीस प्रशासनाशी संपर्क साधला. मात्र, वारंवार कळवूनही पोलीस वेळेवर घटनास्थळी पोहोचले नाहीत, असा आरोप कार्यकर्त्यांनी केला आहे. पोलिसांच्या या दिरंगाईमुळेच मुजोर दुकानदाराला पळून जाण्याची संधी मिळाली, अशी चर्चा आता परिसरात रंगली आहे.
”वर्ध्याची तरुण पिढी अशा अवैध अमली पदार्थांमुळे उद्ध्वस्त होत आहे. दीपक ट्रेडर्समध्ये ज्या प्रकारे साठा सापडला, ते पाहता याला अन्न व औषध प्रशासन (FDA) किंवा पोलिसांचे अभय आहे का? हा प्रश्न पडतो. या मुजोर दुकानदारावर कठोर कारवाई होईपर्यंत आम्ही स्वस्थ बसणार नाही.”
— युवा सेना कार्यकर्ते, वर्धा
प्रशासनासमोर मोठे आव्हान
वर्धा शहरात उघडपणे अमली पदार्थांचे साहित्य आणि प्रतिबंधित गुटखा विकला जात असताना संबंधित विभाग झोपेत आहे का, असा संतप्त सवाल नागरिक विचारत आहेत. शंकर आस्वानी याच्यावर आता पोलीस प्रशासन काय कारवाई करणार आणि यामागे कोणाचे ‘आशीर्वाद’ आहेत, हे पाहणे महत्त्वाचे ठरेल.
स्काय न्यूज लाईव्ह ऑनलाईन
