रुग्णांच्या जीवाशी खेळ? वर्ध्यातील ‘श्री मल्टीस्पेशालिटी हॉस्पिटल’(डॉक्टर संजय तोटे) वादाच्या भोवऱ्यात; उपचारातील हलगर्जीपणामुळे रुग्णाचा मृत्यू झाल्याचा नातेवाईकांचा आरोप
वर्धा:
शहरात मोठ्या थाटामाटात सुरू झालेले ‘तोटे मल्टीस्पेशालिटी हॉस्पिटल’ सध्या रुग्णसेवा नव्हे, तर केवळ पैसे कमावण्याचा व्यवसाय बनले असल्याचे धक्कादायक चित्र समोर आले आहे. रुग्णालयाच्या कथित हलगर्जीपणामुळे आणि अपुऱ्या सुविधांमुळे एका रुग्णाला आपला जीव गमवावा लागल्याचा गंभीर आरोप नातेवाईकांनी केला असून, या घटनेमुळे वर्धा शहरात तीव्र संताप व्यक्त होत आहे.
नेमकी घटना काय?
मिळालेल्या माहितीनुसार, विनायक लोखंडे नामक रुग्णाला अस्वस्थ वाटत असल्याने १९ तारखेला तोटे मल्टीस्पेशालिटी हॉस्पिटलमध्ये दाखल करण्यात आले होते. तपासणीअंती डॉक्टरांनी रुग्णाच्या शरीरातील सोडियम आणि पोटॅशियमची पातळी कमी झाल्याचे सांगितले. यानंतर पुढील तीन दिवस रुग्णावर उपचार सुरू होते. या तीन दिवसांत नातेवाईकांकडून दररोज ६ ते ७ हजार रुपये याप्रमाणे मोठी रक्कम वसूल करण्यात आली.
अपुऱ्या सुविधा आणि ढिसाळ व्यवस्थापन
उपचार सुरू असताना रुग्णाला ‘सिटी स्कॅन’ (CT Scan) करण्यासाठी पाठवण्याचा सल्ला डॉक्टरांनी दिला. मात्र, अत्यंत गंभीर बाब म्हणजे, एवढ्या मोठ्या मल्टिस्पेशालिटी रुग्णालयात रुग्णाला तात्पुरता ऑक्सिजन पुरवण्यासाठी किंवा सुरक्षितपणे नेण्यासाठी ना स्वतःची रुग्णवाहिका (Ambulance) उपलब्ध होती, ना कोणतीही आपत्कालीन ऑक्सिजनची व्यवस्था! अत्यंत बिकट परिस्थितीत रुग्णाला सिटी स्कॅनसाठी नेण्यात आले.
मृत्यूचे कारण सांगण्यास डॉक्टरा असमर्थ
सिटी स्कॅन करून रुग्ण परत रुग्णालयात आल्यानंतर अवघ्या अर्ध्या तासात डॉक्टर तोटे यांनी रुग्णाला मृत घोषित केले. धक्कादायक बाब म्हणजे, रुग्णाचा मृत्यू नेमका कशामुळे झाला, याचे कोणतेही स्पष्ट व समाधानकारक कारण डॉक्टर तोटे आणि त्यांचे वैद्यकीय पथक नातेवाईकांना सांगू शकले नाही. जर तीन दिवस उपचार करूनही रुग्णाच्या प्रकृतीचे नेमके निदान आणि मृत्यूचे कारण डॉक्टरांना सांगता येत नसेल, तर यांच्या वैद्यकीय पात्रतेवरच आता मोठे प्रश्नचिन्ह निर्माण झाले आहे.
कर्मचाऱ्यांची उद्धट आणि निष्काळजी वर्तणूक
रुग्णालयात दाखल असताना रुग्णाची देखभाल करणाऱ्या कर्मचाऱ्यांकडून (Staff) अत्यंत निष्काळजीपणाची वागणूक दिली जात होती, असा थेट आरोपही मृत रुग्णाच्या नातेवाईकांनी केला आहे. रुग्णांच्या आरोग्याकडे लक्ष देण्याऐवजी केवळ बिलांचे आकडे वाढवण्यावरच रुग्णालयाचा भर असल्याचा आरोप आता होतो आहे.
”गोरगरीब रुग्णांच्या टाळूवरचे लोणी खाणारा हा वैद्यकीय व्यवसाय तात्काळ बंद झाला पाहिजे. प्रशासनाने या प्रकरणाची सखोल चौकशी करून दोषींवर कडक कारवाई करावी.”
— संतप्त नातेवाईक व नागरिक
शासकीय कारवाईकडे वर्धावासीयांचे लक्ष
या संवेदनशील घटनेनंतर तोटे हॉस्पिटलच्या कारभारावर वर्धा शहरात मोठ्या प्रमाणावर टीका होत आहे. रुग्णांच्या जीवाशी खेळणाऱ्या आणि सोयी-सुविधांचा अभाव असलेल्या अशा मल्टिस्पेशालिटी रुग्णालयावर आरोग्य विभाग आणि शासन काय कारवाई करणार? डॉक्टर तोटे यांच्यावर गुन्हा दाखल होणार का? याकडे आता संपूर्ण वर्धा शहराचे लक्ष लागले आहे.
