वर्ध्यात पोलिसांची मोठी कारवाई: तब्बल १२ लाख २९ हजारांचा सुगंधित तंबाखू व पानमसाला जप्त; ‘सोनु सुपारीवाला’ अटकेत
वर्धा: वर्ध्याचे पोलीस अधीक्षक श्री. सौरभकुमार अग्रवाल यांच्या कठोर निर्देशानंतर स्थानिक गुन्हे शाखा, वर्धा शहर पोलीस (गुन्हे प्रकटीकरण पथक) आणि अन्न व औषध प्रशासनाने (FDA) संयुक्तपणे एक मोठी कारवाई केली आहे. वर्धा शहरातील भामटीपुरा भागात बेकायदेशीरपणे सुगंधित तंबाखू आणि तंबाखूजन्य पदार्थांची विक्री करणाऱ्या एका कुख्यात विक्रेत्याला अटक करण्यात आली असून, त्याच्याकडून १२ लाख २९ हजार ८७२ रुपयांचा मुद्देमाल जप्त करण्यात आला आहे.
तीन गोदामांवर छापे, मोठी साठवणूक उघड
मिळालेल्या खात्रीशीर माहितीच्या आधारे, दिनांक २२ जून २०२६ रोजी पोलिसांनी भामटीपुरा येथील ‘ताज किराणा’ दुकानावर छापा टाकला. या दुकानाचा मालक शेख इम्रान शेख सुलतान उर्फ सोनु सुपारीवाला (रा. भामटीपुरा, वर्धा) याच्या तीन वेगवेगळ्या ठिकाणच्या गोदामांची झडती घेतली असता, तिथे मोठ्या प्रमाणावर प्रतिबंधित आणि बेकायदेशीर सुगंधित तंबाखू तसेच तंबाखूजन्य पदार्थांचा साठा आढळून आला.
पोलिसांनी तत्काळ अन्न व औषध विभागाला पाचारण केले. अन्न सुरक्षा अधिकाऱ्यांच्या उपस्थितीत वेगवेगळ्या नामांकित कंपन्यांचा सुगंधित तंबाखू, पानमसाला आणि इतर तंबाखूजन्य पदार्थ असा एकूण १२,२९,८७२ रुपये (बारा लाख एकोणतीस हजार आठशे बहात्तर रुपये) किमतीचा माल जप्त करण्यात आला आहे. आरोपीविरुद्ध भारतीय न्याय संहिता (BNS) आणि अन्न सुरक्षा व मानके अधिनियमातील तरतुदींनुसार गुन्हा दाखल करून त्याला अटक करण्यात आली आहे.
आरोपीचा गुन्हेगारी इतिहास
पोलीस सूत्रांकडून मिळालेल्या माहितीनुसार, अटक करण्यात आलेला आरोपी शेख इम्रान उर्फ सोनु सुपारीवाला हा सराईत गुन्हेगार असून, यापूर्वीसुद्धा त्याच्यावर वेगवेगळ्या कलमांन्वये बेकायदेशीर तंबाखू विक्रीचे गुन्हे नोंद आहेत. या मोठ्या कारवाईमुळे शहरातील अवैध तंबाखू आणि गुटखा माफियांचे धाबे दणाणले आहेत.
कारवाई करणारे पोलीस व अधिकारी पथक
ही धडक कारवाई पोलीस अधीक्षक श्री. सौरभकुमार अग्रवाल, अपर पोलीस अधीक्षक श्री. सदाशिव वाघमारे, आणि उपविभागीय पोलीस अधिकारी श्री. प्रमोद मकेश्वर यांच्या मार्गदर्शनात करण्यात आली.
पथकातील प्रमुख अधिकारी व कर्मचारी:
पोलीस निरीक्षक: श्री. विनोद चौधरी (स्थानिक गुन्हे शाखा, वर्धा)
पोलीस निरीक्षक: श्री. विलास पाटील (प्रभारी ठाणेदार, पो.स्टे. वर्धा शहर)
अन्न सुरक्षा अधिकारी: श्री. रविराज धाबर्डे व त्यांचे सहकारी
सहायक पोलीस निरीक्षक (API): आशिषसिंग ठाकूर (LCB)
पोलीस उपनिरीक्षक (PSI): शरद गायकवाड (गुन्हे प्रकटीकरण पथक, वर्धा शहर)
अंमलदार: गजेंद्र धर्में, विवेक बन्सोड, प्रशांत वंजारी, नितीन इटकरे, नरेंद्र कांबळे, श्रावण पवार, अमोल ढोबाळे व इतर पोलीस कर्मचारी.
वर्धा शहर आणि परिसरात अवैध सुगंधित तंबाखू व गुटखा विक्रीच्या पुरवठ्या साखळीला (सप्लाय चेन) मोडून काढण्यात पोलिसांना हे मोठे यश आले असून, पुढील तपास पोलीस करत आहेत.
